Ǹjẹ́ Trump ṣèlérí láti dènà ìdìbòyan Tinubu l’ọ́dun 2027?

Àhesọ: Aṣàmúlò Facebook kan, @Onyee Arangee, sọ wípé Ààrẹ orílẹ-èdè Amẹ́ríkà Donald Trump fẹ́ lọ́wọ́ sí ìdìbò Nàìjíríà tó ń bọ̀ lọ́nà, àti pé ó ti ṣè’lérí láti ríi dájú pé Ààrẹ Bola Tinubu kò tún wọlé lẹ́ẹ̀kejì.

Àbájáde Ìwádìí: Irọ́ ni! Kò sí ẹ̀rí àrídájú pé Ààrẹ orílẹ-èdè Amẹ́ríkà sọ ọ̀rọ̀ yìí tàbí fì’fẹ́hàn sí ètò ìdìbo Nàìjíríà.

Ìròyìn Lẹ́kùńrẹ́rẹ́

Àwọn ẹgbẹ́ olóṣèlú ti bẹ̀rẹ̀ sí ní gbáradì fún ìdìbò Nàìjíríà tó ń bọ̀ lọ́dún 2027. Kódà, àwọn kan ti bẹ̀rẹ̀ sí ní polongo lórí ẹ̀rọ ayélujára láti lè fa ọkàn àwọn olùdìbò mọ́ra. 

Bí èyí ṣe ń lọ́ lọ́wọ́ ni aṣàmúlò Facebook kan, @Onyee Arangee, fí fọ́nrán kan sí’ta nínú èyí tó ti wípé ààrẹ orílẹ-èdè Amẹ́ríkà, Donald Trump, fẹ́ lọ́wọ́ sí ìdìbò Nàìjíríà tó ń bi lọ́nà, àti pé ó ti ṣè’lérí láti ríi dájú pe Ààrẹ Bola Tinubu kò tún wọlé lẹ́ẹ̀kejì.

Arákùnrin ọ̀hún wípé, “Ìròyìn tó tẹ̀ mí lọ́wọ́ lówùúrọ̀ yìí ní pe Donald Trump fẹ́ lọ́wọ́ sí ìdìbo Nàìjíríà. Wọ́n ní Trump kórira Ààrẹ wa, ó sì ti wípé òhun yóò ṣe gbogbo òhun tó bá gbà láti yọ́ọ nípo.

Àwòrán àhesọ náà.

Lọ́jọ́ kẹẹ̀sán, oṣù kẹẹ̀sán, ọdún 2025, ẹ̀ẹ́dẹ́gbaàrún ènìyàn lóti bu’wọ́lu àtẹ̀jáde yìí, tí 25,000 sì ti ri.

Oríṣiríṣi nǹkan l’àwọn ènìyàn ti ń sọ lá’bala àríwísí. 

@Aminu Rogo, fún àpẹẹrẹ, wípé: “Kò lágbára láti ṣe èyí. Àwọn ọmọ Nàìjíríà nìkan ló lè yan ààrẹ wọn pẹ̀lú ìbò. Tí àwọn ọmọ Nàìjíríà bá dì’bò yan Tinubu lẹ́ẹ̀kejì, Trump kò lágbára láti dá sì.”

Ẹlòmíràn, @Archibong Umoren, wípé: “Ẹ sọ fún Donald Trump pé Nàìjíríà là wá wà. A kò sí ní Amẹ́ríkà. Àwọn ènìyàn rẹ̀ l’Ámẹ́ríkà ti ń ṣàròyé lórí ìjọba rẹ̀. Ẹ sọ fun kó fi wá lẹ̀; a ti gb’òmìnira.”

@Ganiyu Sunmonu ní ti rẹ̀ wípé: “Trump kórira Tinubu nítorí kò f’àyè gbàá láti wúwà aburú rẹ̀ ni Nàìjíríà.”

Nítorí bi àwọn ènìyàn ṣe gba àhesọ yìí ni DUBAWA fi ṣe ìwádìí lórí rẹ̀.

Ìfìdíòdodomúlẹ̀ 

Bó bá ṣe pé òtítọ ní pé Ààrẹ Trump sọ òhun tí wọ́n wípé o sọ yìí, àwọn ìwé ìròyìn yóò ti gbé e. A ṣe àgbéyẹ̀wò àwọn ìwé ìròyìn, sùgbọ́n, a kò rí irú ìròyìn báyìí níbẹ̀.

Bákannáà la ṣe àgbéyẹ̀wò gbogbo ibí tí Trump ti sọrọ láìpẹ́ yìí. Ètò ọrọ̀ ajé, èto ìwọ̀lú àti ọ̀rọ ilé ẹjọ́ ní Ààrẹ Améríkà ń sọ̀rọ̀ lórí níta gbangba. Ibí tó ti mẹ́nuba Nàìjíríà ni ìgbà tó sọ̀rọ̀ lórí àwọn tó ń fi ọ̀nà àìtọ́ wọ̀lú Amẹ́ríkà. A kò rí ibìkan tó ti sọ̀rọ̀ nípa ètò ìdìbò Nàìjíríà.

A ṣe àkíyèsí pé kìí ṣe ìgbà àkọkọ tí àwọn ènìyàn tí fa Ààrẹ Trump wọ’nú ọ̀rọ òṣèlú Nàìjíríà lèyí pẹ̀lú àhesọ tí kìí ṣe òtítọ. Lọ́dún 2024, DUBAWA ṣe ìwádìí lórí fọ́nrán kàn nínú èyí tí wọ́n wípé Trump sọ̀rọ̀ nípa ètò òṣèlú  Ààrẹ Tinubu. Sùgbọ́n, irọ́ ló jásí.

Àkótán

DUBAWA kò rí ẹ̀rí tó múná dóko pé Trump fẹ́ lọ́wọ́ sí ètò òṣèlú Nàìjíríà. Irọ́ ni àhesọ yìí.

Rejoice Taddy ló kọ́kọ́ ṣ’àkọsílẹ ìwádìí yìí lé’dè gẹ̀ẹ́sì, tí Sunday Awóṣòro sì túmọ̀ rẹ̀ s’ède Yorùbá.