|
Getting your Trinity Audio player ready...
|
Da’awa: Wani mai amfani da dandalin Facebook, D English Alhaji, ya yi ikirarin cewa wani gungun ‘yan bindiga ya sace shanu daga yankin Mashegu a Jihar Neja, tare da yada wasu hotuna guda biyu da ke nuna wucewarsu.
Hukunci: Yaudara ce. Rahoton tsaro na Hukumar Civil Defence ta Kasa (NSCDC) ya nuna cewa an ga motsin ‘yan bindiga a Karamar Hukumar Magama ne, ba Mashegu ba kamar yadda aka yi ikirari. Haka kuma, hotunan guda biyu da aka yada tare da sanarwar tsofaffin hotuna ne da aka sake amfani da su, ba su da alaka da wannan lamari.
Cikakken Bayani
A ranar 31 ga Agusta, 2026, wani mai amfani da dandalin Facebook, D English Alhaji, ya wallafa bayani kan tsaro yana mai ikirarin cewa wani babban gungun ‘yan bindiga na komawa Jihar Zamfara dauke da dabbobin da suka sata daga yankin Mashegu a Jihar Neja.
Rubutun da aka adana ya ce tawagar ta isa garin Atabo da ke kan hanyar Kontagora zuwa Rijau, yayin da tawaga ta biyu ke biye da su a baya.
“SANARWAR TSARO. An samu rahoton cewa wani babban gungun ‘yan bindiga na komawa Jihar Zamfara dauke da dabbobin da suka sato daga yankin Mashegu a Jihar Neja. Tawagar a yanzu haka tana garin Atabo a kan hanyar Kontagora zuwa Rijau, yayin da tawaga ta biyu ke biye da su a baya.”
Rubutun ya shawarci mazauna yankin da masu ababen hawa da su guji bin hanyar Kontagora zuwa Rijau ta kowane hali.
Mai amfani da shafin ya sanya hotuna guda biyu. Hoton farko ya nuna wasu mutane da suka rufe fuskokinsu sanye da bakaken kaya dauke da bindigogi a kan babura a kan wata hanya mai kura, yayin da hoto na biyu kuma ya nuna wani mutum sanye da kakin soji rike da bindiga a tsaye kusa da garken shanu.
Ya zuwa ranar 1 ga Satumba, 2026, rubutun ya samu kusan mutane 9,300 da suka nuna sha’awa, sharhi 1,100, da kuma sake yadawa sau 886.
Wannan sanarwa ta janyo martani daga mutane da dama da ke nuna damuwa kan halin da tsaro yake ciki.
Alal misali, Adeola Emmanuel ya tambayi inda jiragen yakin Rundunar Sojin Saman Najeriya suke domin fatattakar ‘yan bindigar daga sama.
Wani kuma, Kenneth Uzoezie, ya alakanta lamarin da kalubalen siyasa da tattalin arzikin kasar, yayin da Cintt Chepngetich, wanda ya yi sharhi daga Kenya, ya nuna shakku kan ayyukan rundunar sojin saman.
DUBAWA ta kuma gano cewa wasu masu amfani da Facebook da dama sun sake yada wannan sanarwar ta tsaro a shafukansu daban-daban, kamar nan da nan da kuma nan.
Ganin yadda wannan batu zai iya ruruta fargaba da tayar da hankulan mazauna yankin, DUBAWA ta binciki hotunan da kuma bayanan da ke cikin rubutun.
Tantancewa
DUBAWA ta ciro sassan hotunan tare da gudanar da binciken gano asalin hoto ta Google Lens domin gano ko hotunan da aka wallafa a Facebook sababbi ne.
Binciken ya fitar da tsofaffin nau’ikan hotunan biyu, inda ya tabbatar da cewa babu daya daga cikinsu da aka fara wallafawa dangane da sanarwar ranar 31 ga Agusta, 2026.
Hoton farko, wanda ke nuna mutane dauke da makamai a kan babura a wata hanya mai kura, an gano shi ne a wani rubutu da Gidauniyar Solomon Dalung ta wallafa a Facebook a ranar 5 ga Yuni, 2026. Haka kuma an gano hoton a wasu shafukan yanar gizo kafin rubutun da D English Alhaji ya wallafa (nan da nan da kuma nan).
Binciken gano asalin hoto na biyu ya fito da wani tsohon labari da kafar yada labarai ta PRNigeria ta wallafa a ranar 1 ga Yuli, 2026. Hoton da ke nuna mutum sanye da kakin soji kusa da shanu ya kasance a yanar gizo tun kafin sanarwar tsaro ta ranar 31 ga Agusta.
Domin tabbatar da ko ikirarin kansa ya dogara ne a kan wani lamari na gaske,
DUBAWA ta tuntubi Rundunar Hukumar Tsaro ta NSCDC ta Jihar Neja. Kakakin rundunar, DSC Abubakar Muti, ya bamu bayanin tsaro na ranar 31 ga Agusta, 2026, wanda ya tabbatar da zargin ayyukan ‘yan bindiga a Karamar Hukumar Magama, ba Mashegu ba kamar yadda aka yi ikirari.
Bayanin na NSCDC ya nuna cewa ‘yan bindiga sun sace shanu a yankin Atabo da ke Karamar Hukumar Magama, kuma sun kasa fita daga yankin sakamakon jami’an tsaro da suka tare hanyoyin fita. Haka kuma sanarwar ta bayyana cewa an hango wani gungun mutane dauke da makamai a kan babura a kewayen kauyen Rima. Sai dai kuma bayanin bai ambaci wani aiki na ‘yan bindiga a Mashegu ba kamar yadda rubutun na Facebook ya nuna.
Ko da yake bayanin na NSCDC ya nuna cewa an samu ayyukan ‘yan bindiga a wasu sassan Magama a wannan rana, hakan bai tabbatar da cewa hotunan biyu da D English Alhaji ya yada an dauke su ne a lokacin wadannan abubuwan da suka faru ba.
A Karshe
Wannan ikirari yaudara ce. Hotunan guda biyu da aka yada a shafin Facebook an sake amfani da su ne kuma sun dade a yanar gizo. Duk da cewa bayanin NSCDC ya tabbatar da ayyukan ‘yan bindiga a wannan rana a wasu kauyuka na Karamar Hukumar Magama kamar Atabo, Yangalu da Rima, lamarin bai faru a Mashegu ba.
Wannan bincike an gudanar da shi ne a karkashin shirin Cibiyar Bunkasa Aikin Jarida da Kirkire-kirkire (CJID) tare da tallafin Tarayyar Turai (European Union).