|
Getting your Trinity Audio player ready...
|
Àhesọ: Asare Obedi pín fọ́nrọ́n kan lórí Facebook, èyí tí ó ṣàfihan obìnrin kan tó ń gun òkùn láti sọdá odò. Asare wípé báyìí ló ṣe ń ṣẹlẹ̀ ni Nàìjíríà.
Àbájáde Ìwádìí: Irọ́ lèyìí. Ìwádìí DUBAWA ṣàfihàn pé ìlú Sùdánì (Sudan) ni wọ́n ti ya fọ́rọ́n yìí.
Ìròyìn Lẹ́kùńrẹ́rẹ́
Aṣàmúlò Facebook kan, Asare Obedi pín fọ́nrọ́n kan, èyí tó ṣàfihan bí obìnrin kan ṣe ń f’okùn sọdá odò. Asare wípé báyìí ni orílẹ-èdè Nàìjíríà ti wá bàjẹ́ to.
Ohùn kan ṣàlàyé ohun tó ń ṣẹlẹ̀ nínú fọ́nrán ọ̀hún. Ó wípé:
“Èyí kìí ṣe eré orí ìtàgé o. Ohun tó ń ṣẹlẹ̀ ní Nàìjíríà rèé. Lójoojúmọ́ l’àwọn ènìyàn ń fi ẹ̀mí ara wọn wé’wu, tí wọ́n ń sọdá odò báyìí. Kòsí afárá. Òkùn tó ti gbó yìí nìkan ló wà. Èyí burú, o ṣì léwu.”
Ẹ̀ẹ́dẹ́gbààje ènìyàn ló ti pín àtẹ̀jáde yìí, ti ẹgbaàfà ènìyàn sì ti buwọ́lùú lọ́jọ́ kankàndílọ́gbọ̀n, oṣù kẹjọ, ọdún 2025.
Bí àwọn aṣàmúlò kan ṣe gba àhesọ yìí gbọ́, là’wọn kan pèé ní’rọ́.
Victor Kweku kọ báyìí: “Òmìrán Áfíríkà? Báwo wá ni aràrá Áfíríkà yóò ṣe rí? Ẹ gbàyìí rò.”
King Isong ní tirẹ̀ wípé, “Ó ṣe jẹ́’pé gbogbo ǹkan tí kò da ni wọ́n fi máa ń wé Nàìjíríà lágbayé. Èyí kìí ṣe Nàìjíríà.”
DUBAWA ṣe ìwádìí yìí nítorí pé fọ́nrọ́n yìí ń ṣàfihàn ohun aburú nípa orílẹ̀-èdè Nàìjíríà, èyí tó lè ṣi àwọn aṣàmúlò ẹ̀rọ ìbánidọ́rẹ̀ẹ́ lọnà.
Ìfìdíòdodomúlẹ̀
A fi InVID WeVerify pín fídíò yìí sí abala. Ìwádìí lórí àwọn abala wọ̀nyí tọpinpin àwòrán náà sí ìṣẹ̀lẹ̀ kan l’órílẹ̀-ède Sùdánì (Sudan) l’óṣù kẹẹ̀sán, ọdún 2024. Dípò ohun tí Asare sọ, fọ́nrọ́n yìí ń ṣàfihàn bí wọ́n ṣe ń ran àwọn ènìyàn lọ́wọ́ láti sọdá odò, lẹyìn tí Fáárá Morni ṣubú lulẹ̀ nílùu Darfur.
Àjọ tó ń rí sí ẹ̀tọ́ ọmọnìyàn (Sudan International Rights Organization [SIHRO]) pín fọ́nrọ́n yìí sórí ẹ̀rọ X, lọ́jọ́ keje, oṣù kẹsán, ọdún 2024.
Ohun tí SIHRO kọ kà báyìí: “Wíwó tí Fáárá Morni wó ti fa kí àwọn ará ìlú ma fi ẹ̀mí ara wọn wé’wu nípa sísọdá odò pẹlú okùn. Ìrúfin ẹ̀tọ́ ọmọnìyàn lèyìí jẹ́.”
Yàtọ̀ sí SIHRO, Médecins Sans Frontières (MSF) náà jẹ́rìí sí ìṣẹ̀lẹ̀ náà nínú àtẹ̀jáde orí X rẹ̀, lọ́jọ́ kejìlá, oṣù kẹjọ, ọdún 2024.
Àkótán
Ìwádìí DUBAWA fihàn pé fọ́rán tí Asare pín ò ní ǹkan ṣe pẹ̀lú orílẹ̀-èdè Nàìjíríà. Dípò èyí, àti ibi ìṣẹ̀lẹ̀ ọdún 2024 kan, nílu Dafur, Sùdánì ni fídíò ọ̀hún ti ṣẹ̀wá.
Juliet Buna ló kọ́kọ́ ṣ’àkọsílẹ ìwádìí yìí lé’dè gẹ̀ẹ́sì, tí Sunday Awóṣòro sì túmọ̀ rẹ̀ s’ède Yorùbá.
