|
Getting your Trinity Audio player ready...
|
Da’awa: Wani mai amfani da kafar X ya yaɗa wani bidiyo yana mai ikirarin cewa ‘yan bindiga sun sace wani babban jami’in Kwalejin ‘Yan Sanda ta Najeriya da ke Wudil a kwanan nan yayin da yake tafiya Jihar Kebbi.
Hukunci: Yaudara ce. Ko da yake an sace Sufeto Kabiru Bello tare da wasu mutane biyu, faifan bidiyon tsoho ne. Rahotanni sun nuna cewa tuni aka saki jami’in.
Cikakken Bayani
A ranar 24 ga Agusta, 2026, wani mai amfani da dandalin X, PATRIOTIC SOJA ($TSIR-MUNCHAN) (@Pressman2040), ya wallafa wani bidiyo yana mai ikirarin cewa ‘yan bindiga sun yi wa wani jami’in Kwalejin ‘Yan Sanda ta Najeriya (POLAC) da ke Wudil kwanton-bauna tare da sace shi a kan hanyarsa ta zuwa Jihar Kebbi.
Faifan bidiyon da ya karade gari ya nuna mutane uku da aka yi garkuwa da su, ciki har da wani jami’i da aka bayyana da Sufeto Kabiru Bello, a cikin daji kewaye da mutane masu dauke da makamai. Mutanen da aka sace sun roki hukumomi, ‘yan uwa, da sauran jama’a da su kawo musu dauki.
Bayanin rubutun (wanda aka ajiye a nan) ya ce, “’Yan bindiga sun sace wani babban jami’in Kwalejin ‘Yan Sanda ta Wudil yayin da yake tafiya Jihar Kebbi. Har yanzu cikakkun bayanai ba su fito ba, amma labarin ya jefa rundunar da sauran al’umma cikin damuwa. Wannan lamari ba wai ya shafi mutum daya ba ne kawai; ya shafi halin da tsaro yake ciki ne a manyan hanyoyinmu.”
Wannan bidiyo ya janyo ra’ayoyi daban-daban daga masu amfani da kafafen sada zumunta.
Wani mai amfani da dandalin X, ManGod (@onyi84432509), ya yi sharhi da cewa, “Damuwa? Ko da yake wannan labari ne mai ban tausayi, ban yarda zai jefa kowa a Najeriya cikin damuwa ba sai dai iyalan jami’in. Muna cikin mawuyacin hali a kasar nan.”
Wani mai amfani da kafar, Olayinka (@Olayink79), ya tofa albarkacin bakinsa yana cewa, “Kash! Allah ya sa ya dawo da rai. Akwai ‘yan leken asiri a cikin dakarun Najeriya. Don Allah ku rika lura da bayanku a kowane lokaci.”
Ya zuwa ranar 25 ga Agusta, 2026, bidiyon ta samu mutane fiye da 3,590 da suka kalla, martani 33, sake yadawa 16, a cikin ‘yan sa’o’i kadan da fitarsa.
Irin wannan bidiyo ya sake bayyana a dandalin Facebook a nan da kuma nan.
Ganin cewa wannan ikirari ne da ya shafi tsaro kuma yana da yiwuwar haifar da firgici a tsakanin al’umma, DUBAWA ta yanke shawarar tantance gaskiyar lamarin.
Tantancewa
DUBAWA ta gudanar da binciken hoto ta hanyar amfani da hotunan da aka ciro daga faifan bidiyon da ke yawo, kuma hakan ya tabbatar da cewa bidiyon ba sabo ba ne.
Tun asali bidiyon ya bayyana ne a yanar gizo watanni da suka gabata, inda aka yada shi sosai a dandalin Facebook a ranakun 4 da 5 ga Janairu, 2026, a shafuka daban-daban a nan, nan, nan, da kuma nan.
Bincike a kan abin da ke cikin bidiyon ya tabbatar da cewa faifan rikodin gaskiya ne wanda masu garkuwar suka dauka bayan sace Sufeto Kabiru Bello da wasu matafiya guda biyu.
Da suke magana da harshen Hausa, wadanda aka sace sun bayyana sunayensu a matsayin Kabiru Bello Adamu, wanda ke aiki a matsayin jami’i a Kwalejin ‘Yan Sanda ta Wudil; Sai Muntari; da Musa Rabiu (wanda aka fi sani da Danladi), dukkaninsu ‘yan Karamar Hukumar Tofa a Jihar Kano.
A cikin bidiyon, mutanen sun bayyana cewa, “Lamarin sace su ya faru ne a kan hanyarsu ta zuwa Jihar Kebbi don ganin ‘yan uwa da abokan aiki.”
To sai dai a cewar wani labari da kafar yada labarai ta Kano Times ta wallafa a ranar 8 ga Janairu, 2026, wata majiya a cikin Rundunar ‘Yan Sandan Najeriya ta tabbatar da cewa Sufeto Kabiru Bello ya samu ‘yanci.
DUBAWA ta tuntubi kakakin Rundunar ‘Yan Sandan Jihar Kano, Abdullahi Haruna, wanda shi ma ya tabbatar da cewa bidiyon ba sabo ba ne, kodayake bai bayyana yadda aka sako su ba.
Abdullahi ya ce: “Abin da zan iya fada muku shi ne wannan bidiyon ba sabo ba ne.”
A Karshe
Da’awar da ke cewa an sace wani jami’in Kwalejin ‘Yan Sanda a kwanan nan a kan hanyarsa ta zuwa Jihar Kebbi yaudara ce. Faifan bidiyon da ke tun watan Janairun 2026 aka wallafa shi, kuma rahotannin ‘yan sanda sun tabbatar da cewa tuni aka sako wanda aka sacen, Sufeto Kabiru Bello.